आमदार तांबे यांच्या संगमनेर 2.0 च्या नव्या ध्येयप्रवासाचा शुभारंभ; नागरिकांच्या सहभागातून घडणार शहराचा आराखडा

संगमनेर, १४ नोव्हेंबर : आगामी नगरपरिषद निवडणुकांच्या पार्श्वभूमीवर संगमनेर शहराच्या भविष्याचा आराखडा नागरिकांच्या सहभागातून तयार व्हावा या उद्देशाने आमदार सत्यजीत तांबे यांनी ‘संगमनेर 2.0’ हा अनोखा उपक्रम सुरू केला आहे. या अंतर्गत शहरातील सर्व वर्गातील नागरिक, संस्था, मंडळे आणि विविध क्षेत्रातील प्रतिनिधींशी थेट संवाद साधण्यात येत आहे. हे संवाद सत्र येत्या शुक्रवार आणि शनिवारी संध्याकाळी सात वाजता मालपाणी लॉन्स येथे आयोजित करण्यात आले आहे.

या विशेष संवाद सत्राच्या निमित्ताने आमदार सत्यजीत तांबे यांनी माध्यमांशी चर्चा करताना सांगितले की संगमनेरच्या विकासात नागरिकांचा सहभाग अत्यंत महत्त्वाचा आहे. ते म्हणाले, “हा जाहीरनामा म्हणजे केवळ राजकीय दस्तऐवज नाही, तर संगमनेरकरांच्या स्वप्नांचा आणि अपेक्षांचा आरसा असेल. शहराच्या भविष्यातील वाटचालीत प्रत्येक नागरिकाचा आवाज महत्त्वाचा आहे. सामान्यपणे निवडणुकीत जाहीरनामा काही मोजक्या लोकांच्या बैठकीत तयार होतो. पण या वेळी आम्ही ठरवले आहे की संगमनेरकरांनी स्वतः आपल्या शहराचा जाहीरनामा तयार करावा.”

संगमनेर 2.0 या उपक्रमात आत्तापर्यंत विविध क्षेत्रातील मान्यवरांनी आणि नागरिकांनी सहभाग नोंदविलेला आहे. डॉक्टर्स, वकील, इंजिनियर, विद्यार्थी, महिला यांनी क्यू आर कोड स्कॅन करून आपल्या भूमिका मांडलेल्या आहेत. विविध संस्था संघटनांनी सुद्धा प्रत्यक्ष भेटून या जाहीरनाम्यात काय समाविष्ट असावे याबाबतीतील आपल्या भूमिका सादर केलेल्या आहेत. आत्तापर्यंत गुगल फॉर्म, सोशल मीडिया, व्हॉट्स अप ईमेल आणि प्रत्यक्ष भेटींद्वारे पाच हजारांहून अधिक सूचना आणि कल्पना प्राप्त झाल्या आहेत.

सत्यजीत तांबे यांनी यावर भर देताना सांगितले की ज्येष्ठ नेते बाळासाहेब थोरात आणि डॉ. सुधीर तांबे यांच्या नेतृत्वाखाली संगमनेरने गेल्या काही दशकांत उल्लेखनीय प्रगती केली आहे. आता या प्रगतीला नवे रूप देत, पुढील पन्नास वर्षांसाठी आधुनिक, हिरवेगार, पर्यटनकेंद्रित आणि डिजिटल संगमनेर उभारण्याचे स्वप्न त्यांना पाहत आहे. हा कार्यक्रम सर्व नागरिकांसाठी खुला असून, विशेषतः युवक, महिला, व्यावसायिक, शेतकरी आणि सामाजिक संस्थांचे प्रतिनिधी यांना आपले विचार मांडण्यासाठी प्रोत्साहन दिले जाईल.

आमदार सत्यजीत तांबे हे स्वतः नगर नियोजन, युवक धोरण आणि शाश्वत विकास या क्षेत्रांत कार्यरत असून त्यांनी ‘सिटीजन विल’ या नगरनियोजन विषयक महत्त्वाच्या पुस्तकाचा मराठी अनुवादही केला आहे. त्यांच्या या अभ्यासू वृत्तीमुळेच संगमनेर 2.0 ला नागरिकांकडून विविध सूचना मिळत आहेत. या सूचनांमध्ये शहर नियोजन आणि विकास, स्थानिक उद्योगवृद्धी, युवकांना रोजगार, पाणीपुरवठा, वाहतूक व्यवस्था, शिक्षण, आरोग्य आणि पर्यावरण संवर्धन अशा विविध विषयांचा समावेश आहे.

संगमनेर 2.0 अंतर्गत नागरिकांकडून मिळालेल्या काही सूचना आधीच चर्चेत आहेत. शहरात सायकल ट्रॅक, स्वच्छतेसाठी स्मार्ट सेन्सर तंत्रज्ञान, स्थानिक पर्यटन प्रोत्साहन योजना आणि नवीन स्टार्टअप पार्क अशा काही प्रस्तावांना विशेष प्रतिसाद मिळत आहे. शहराच्या विकासात योगदान देऊ इच्छिणाऱ्या प्रत्येक संगमनेरकरासाठी आता व्हाट्सअप नंबर 9112773773 सुरू करण्यात आलेला आहे.

शेवटी सत्यजीत तांबे यांनी स्पष्ट केले की संगमनेरचा विकास हा फक्त आमदार किंवा नगरसेवकांचा विषय नाही, तो प्रत्येक संगमनेरकराचा विषय आहे. येत्या दोन दिवसांच्या संवाद सत्रात ते स्वतः उपस्थित राहून प्रत्येकाची मते ऐकणार असल्याचे सांगितले. त्यांनी सर्व नागरिकांना संध्याकाळी साडेसात वाजता होणाऱ्या या कार्यक्रमात सहभागी होण्याचे आवाहन केले आणि सांगितले की प्रत्येकाच्या मताचे प्रतिबिंब संगमनेर 2.0 मध्ये दिसेल.