धारावी होणार पुढील वांद्रे कुर्ला कॉम्प्लेक्स! ‘धारावी झोपडपट्टी’ पुनर्विकास प्रकल्पाचे काम अदानी समूहाकडे

धारावीतील पुनर्विकास आणि बांधकामासाठी एकूण 3 कंपन्यांनी निविदा सादर केल्या होत्या. धारावी झोपडपट्टीच्या पुनर्विकास प्रकल्पाची बोली अदानी समूहाच्या अदानी रियल्टीने जिंकली आहे. मुंबईतील धारावीची गणना आशियातील सर्वात मोठ्या झोपडपट्ट्यांमध्ये केली जाते. महाराष्ट्र सरकारने धारावी पुनर्विकास प्रकल्पासाठी मंगळवार, २९ नोव्हेंबर रोजी आर्थिक निविदा उघडल्या. धारावी पुनर्विकास प्रकल्पाचे सीईओ एसव्हीआर श्रीनिवार म्हणाले, “आम्हाला एकूण तीन बोली मिळाल्या होत्या. अदानी समूह आणि डीएलएफच्या बोली उघडल्या त्यात अदानी समूहाची बोली 5,069 कोटी आणि डीएलएफची बोली 2,025 कोटी होती.

आता ही बोली राज्य सरकारकडे मंजुरीसाठी पाठवणार असल्याचे श्रीनिवास यांनी सांगितले. तसेच, धारावीच्या पुनर्विकासासाठी स्पेशल पर्पज व्हेईकल (SPV ) तयार केले जाईल. धारावीच्या पुनर्विकास आणि झोपडपट्टीतील रहिवाशांच्या पुनर्वसनाशी संबंधित प्रकल्पासाठी अदानी रियल्टी, नमन ग्रुप आणि डीएलएफ या तीन कंपन्यांनी निविदा सादर केल्या होत्या. गेल्या 15 वर्षांत अनेक प्रयत्नांनंतर अखेर धारावीचा पुनर्विकास किंवा पुनर्विकास सुरू होणार आहे.

या आधारावर विजयी बोली निवडली
20,000 कोटींहून अधिक किमतीच्या या प्रकल्पासाठी विजेत्याची निवड या प्रकल्पात सर्वात जास्त प्रारंभिक गुंतवणूक कोण करू शकते या आधारावर करण्यात आली आहे. धारावीचा पुनर्विकास प्रकल्प येत्या 17 वर्षात पूर्ण होईल आणि त्याचे पुनर्वसन पुढील 7 वर्षांत पूर्ण होईल, अशी अपेक्षा महाराष्ट्र शासनाला आहे. सुमारे 10 दशलक्ष चौरस फूट क्षेत्र धारावी पुनर्विकास प्रकल्पांतर्गत येणे अपेक्षित आहे. 1 ऑक्टोबर रोजी जागतिक निविदा प्रसिद्ध करण्यात आली. महाराष्ट्र सरकारने यापूर्वी 2019 मध्ये धारावीच्या पुनर्विकासासाठी जागतिक निविदा काढली होती, जी अयशस्वी ठरली होती. यानंतर यावर्षी 1 ऑक्टोबर रोजी पुन्हा जागतिक निविदा काढण्यात आली, ज्यामध्ये एकूण 8 कंपन्यांनी सुरुवातीलाच स्वारस्य दाखवले होते. यापैकी 5 भारतीय आणि 3 विदेशी कंपन्या आहेत. मात्र, यापैकी केवळ तीन निविदा सादर केल्या गेल्या.

56,000 हून अधिक कुटुंबांचे पुनर्वसन होणार आहे.
श्रीनिवास यांनी 1 नोव्हेंबर रोजी एका मुलाखतीत सांगितले होते की, धारावी हे पुढील वांद्रे कुर्ला कॉम्प्लेक्स बनण्याची शक्यता आहे, जो आज मुंबईतील सर्वात पॉश एरियापैकी एक आहे. हा प्रकल्प पूर्ण झाल्यानंतर येथे 56,000 हून अधिक कटुंबांचे पुनर्वसन होणार आहे. या झोपडपट्टीत राहणाऱ्या प्रत्येक कुटुंबाला 405 चौरस फूट चटईक्षेत्राचे घर मिळणार आहे. 1 कोटी चौरस फूट बांधकाम क्षेत्रापैकी सुमारे 70-80 लाख चौरस फूट पुनर्वसनासाठी वापरण्यात येणार आहे व उर्वरित क्षेत्र खुल्या बाजारात विकले जाईल.