भोसरी ते किल्ले शिवनेरी बससेवेचा पुढील आठवड्यात शुभारंभ; आमदार अतुल बेनके यांच्या पाठपुराव्याला यश

नारायणगाव | पुणे जिल्ह्यातील जुन्नर तालुक्यातील किल्ले शिवनेरीवर देशभरातून येणाऱ्या पर्यटकांसाठी आता पीएमपीएमएल बससेवा सुरू होणार आहे. किल्ले शिवनेरी म्हणजेच छत्रपती शिवाजी महाराज यांचे जन्मस्थान असलेल्या जुन्नर तालुक्यातील या पर्यटनस्थळी जाण्यासाठी आता पिंपरी चिंचवड मधील भोसरी डेपो ते किल्ले शिवनेरी जुन्नर अशी बससेवा सुरू होणार आहे.
जुन्नर तालुक्याचे आमदार अतुल बेनके यांनी २५ ऑक्टोबर २०२१ रोजी पीएमपीएमएलचे व्यवस्थापकीय संचालक लक्ष्मी नारायण मिश्रा यांना पत्र लिहून भोसरी ते किल्ले शिवनेरी जुन्नर अशी बससेवा सुरू करण्यात यावी अशी मागणी केली होती.

पुणे, पिंपरी चिंचवड शहरासह राज्यातून आणि देशभरातून मोठ्या प्रमाणावर पर्यटक हे शिवजन्मभूमी किल्ले शिवनेरी, जुन्नर, नारायणगाव, ओझर, लेण्याद्री येथे येत असतात. नारायणगाव, जुन्नर परिसरातील नागरिक व कामगार विद्यार्थी हे देखील पुणे पिंपरी चिंचवडला जाण्यासाठी खाजगी वाहनाने प्रवास करत आहेत. सध्या भोसरी ते मंचर पीएमपीएमएलची बससेवा सुरू असून या बसला प्रवासी वर्गाचा चांगला प्रतिसाद मिळत आहे. जुन्नर, नारायणगाव हि शहरं देखील झपाट्याने वाढत आहेत. दर रविवारी पर्यटक तसेच शिवभक्त मोठ्या प्रमाणावर किल्ले शिवनेरी या ठिकाणी येत असतात. तसेच अष्टविनायकापैकी दोन तीर्थक्षेत्र स्थळे जुन्नर तालुक्यात असल्यामुळे गणेश भक्तांचीही जुन्नर तालुक्यात ये जा असते.

या पर्यटक नागरिकांची व भाविकांची गैरसोय लक्षात घेता भोसरी ते जुन्नर मार्गावर पीएमपीएमएलची बससेवा सुरु करण्यात यावी अशी मागणी आमदार बेनके यांनी पीएमपीएमएल कडे केली होती. पीएमपीएमएल प्रशासनाने भोसरी ते किल्ले शिवनेरी जुन्नर या मार्गाचा सर्व्हे नुकताच केला आहे. तसेच या संदर्भात आज जिल्हाधिकारी डॉ.राजेश देशमुख यांचीही भेट आ.अतुल बेनके यांनी घेतली होती.तसेच पीएमपीएमएलच्या वरिष्ठ अधिका-यांशी चर्चा केली या मागणीची दखल घेत प्रशासनाने सकारात्मक प्रतिसाद दिला आहे. येत्या शिवजयंतीच्या पार्श्वभूमीवर पुढील आठवड्यापासून भोसरी ते किल्ले शिवनेरी जुन्नर या बससेवेचा लाभ शिवभक्तांना मिळणार आहे अशी माहिती आ.बेनके यांनी दिली आहे.