पुणे जिल्हा बँकेच्या अध्यक्षपदी दिगंबर दुर्गाडे तर उपाध्यक्षपदी सुनील चांदेरे यांची वर्णी

पुणे | पुणे जिल्हा मध्यवर्ती सहकारी बँकेच्या (पीडिसीसी) अध्यक्षपदी प्रा. दिगंबर दुर्गाडे (पुरंदर) तर उपाध्यक्षपदी सुनील चांदेरे (मुळशी) यांची एकमताने निवड करण्यात आली आहे. राष्ट्रवादीचे नेते आणि उपमुख्यमंत्री अजित पवार यांनी हि निवड केली आहे. पुणे जिल्हा मध्यवर्ती सहकारी बँकेच्या अध्यक्ष आणि उपाध्यक्ष पदाची निवडणूक आज पार पडली. अध्यक्ष आणि उपाध्यक्ष पदासाठी जिल्ह्यातील अनेक नावं चर्चेत होती. आजच्या निवडीतून अजित पवार यांनी जिल्ह्यातील भविष्यातील निवडणुका लक्षात घेऊन राजकीय समतोल साधल्याचे बोलले जात आहे.

नवीन अध्यक्ष प्रा. दिगंबर दुर्गाडे यांनी बँकेवर अध्यक्ष म्हणून यापूर्वी काम पाहिले आहे. बँकेच्या कामकाजाचा असलेला अनुभव आणि क्षमता विचारात घेऊन त्यांची निवड करण्यात आली आहे. तर उपाध्यक्ष पदी सुनील चांदेरे यांची निवड करून तरुण चेहऱ्याला संधी देण्यात आली आहे.

दरम्यान, आजच्या बैठकीस बँकेचे संचालक तसेच राज्याचे उपमुख्यमंत्री अजित पवार, गृहमंत्री दिलीप वळसे पाटील, दुग्ध व्यवसाय राज्यमंत्री दत्तात्रय भरणे यांच्यासह राष्ट्रवादी काँग्रेसचे आमदार अशोक पवार, आमदार दिलीप मोहिते पाटील, काँग्रेसचे आमदार संजय जगताप यांच्यासह संचालक उपस्थित होते. जिल्हा बँकेत राष्ट्रवादी काँग्रेसचे १७, काँग्रेसचे २ आणि भाजपचे २ असे एकूण २१ संचालकांचे संख्याबळ आहे. अध्यक्ष उपाध्यक्ष निवडणुकीनंतर उपमुख्यमंत्री अजित पवार यांनी प्रसारमाध्यमांशी संवाध साधला. सध्याच्या परिस्थितीत बँका चालवणे खूप अवघड झाले असल्याचे पवार यांनी सांगितले.