शिरूर तालुक्यातील करंदी येथे सुरू झालेल्या विधी महाविद्यालयाला दिलीप वळसे पाटील यांचे नाव

शिरूर तालुक्यातील करंदी येथे नव्याने सुरू झालेल्या विधी महाविद्यालयाला माजी गृहमंत्री व आंबेगाव-शिरूरचे आमदार श्री. दिलीप वळसे पाटील यांचे नाव देण्यात आले आहे. या निर्णयाबाबत बोलताना आयोजक व संस्थेचे विश्वस्त म्हणाले की, “ही नामनिर्देशना राजकीय जवळिकीमुळे नाही, तर वळसे पाटील यांच्या बौद्धिक, सामाजिक आणि नैतिक अधिष्ठानामुळे करण्यात आली आहे.”

आयोजकांनी सांगितले की, सर्वोच्च न्यायालयाचे विद्यमान मुख्य न्यायमूर्ती न्यायमूर्ती गवई यांच्यासोबत वळसे पाटील यांचे असलेले वैयक्तिक संबंध आणि त्यांच्याविषयीचा सन्मान हा त्यांच्या व्यक्तिमत्त्वाच्या उंचीची प्रचिती देतो. “मितभाषीपणा, लोकांप्रती जिव्हाळा आणि शिस्तप्रियतेची अपेक्षा असलेले समाजाभिमुख नेतृत्व म्हणूनच आम्ही या महाविद्यालयाला त्यांचे नाव दिले आहे,” असे आयोजक म्हणाले.

वळसे पाटील यांनी एल.एल.एम. आणि पत्रकारिता पदवी घेतली असून, मागील साडेतीन दशकांहून अधिक काळ ते शिक्षण, सहकार, आरोग्य व पायाभूत सुविधा उभारणीसाठी कार्यरत आहेत. त्यांच्या नावाने सुरू झालेले करंदी येथील हे महाविद्यालय ग्रामीण भागात दर्जेदार विधी शिक्षणाची नवी दारे खुली करेल, असा विश्वास आयोजकांनी व्यक्त केला.