पुणे जिल्हा परिषदेची सदस्य संख्या 75 वरून 82 पर्यंत वाढणार? प्रारूप गट आणि गण रचना पुन्हा बदलणार!
पुणे जिल्हा परिषदेची सदस्य संख्या 75 वरून 82 पर्यंत वाढणार?
राज्यातील जिल्हा परिषद सदस्यांची संख्या जास्तीत जास्त 75 वरून 85 पर्यंत आणि कमीत कमी 50 वरून 55 करण्यास राज्य मंत्रिमंडळाची मंजुरी मिळाली आहे. या निर्णयामुळे प्रारूप गट आणि गण रचना पुन्हा बदलणार आहे.
यासंदर्भात राज्य निवडणूक आयोगातर्फे जिल्ह्यातील निर्वाचक गटांतून निवडून द्यावयाच्या सदस्यांची संख्या निश्चित करण्यात येईल. तसेच, एखाद्या जिल्हा परिषदेच्या प्रादेशिक क्षेत्राची लोकसंख्या आणि निवडणुकीव्दारे भरवण्यात येणाऱ्या अशा जिल्हा परिषदेमधील जागांची संख्या यामधील प्रमाण हे राज्यभर समान असेल.
सध्या राज्यातील जिल्हा परिषद सदस्यांची संख्या कमीत कमी 50 व जास्तीत जास्त 75 इतकी आहे. यामुळे आता पुन्हा नवी गटरचना आणि आरक्षण जाहीर होणार आहे. निवडणूक आयोगाने सध्याची संख्या लक्षात घेऊन गण आणि गणांची सीमारेषा ठरविण्याचा आदेश दिला होता. हे काम अंतिम टप्प्यात असतानाच सरकारने सदस्यांची वाढविण्याचा निर्णय घेतला. महापालिका, नगरपालिका येथेही सरकारने सदस्यसंख्या या आधी वाढवली आहे.
जिल्हा परिषद व पंचायत समिती अधिनियम 1961 मधील कलम 9 (1) मध्ये सुधारणा करण्यात येणार आहे. त्यानुसार कमीत कमी 55 व जास्तीत जास्त 85 अशी जिल्हा परिषदेसाठी सदस्य संख्या होणार आहे. या सुधारणेमुळे राज्यातील जिल्हा परिषद सदस्यांची संख्या 2000 वरुन 2248 इतकी व पंचायत समिती सदस्यांची संख्या देखील 4000 वरुन 4496 इतकी होणार आहे.