‘निर्दयी’ शुभमन गिल; शतक झळकावताना जरा विचार केला नाही, धोकादायक गोलंदाजांचे करिअर संपवले

भारताने न्यूझीलंडविरुद्धच्या तिसऱ्या टी-२० सामन्यात धमाकेदार विजय मिळवला. प्रथम फलंदाजी करणाऱ्या भारताने धावांचा डोंगर उभा केला आणि नंतर न्यूझीलंडचा ६६ धावांवर ऑलआउट करून १६८ धावांनी विक्रमी विजय मिळवला. भारताकडून या सामन्या शुभमन गिलने स्फोटक खेळी करत शतक झळकावले. यासाठी त्याला सामनावीर पुरस्कार मिळाला.

गिलने ६३ चेंडूत ७ षटकार आणि १२ चौकारांसह १२६ धावा केल्या. गिलच्या या खेळीने भारताने धावांचा डोंगर उभा केला. पण त्याच बरोबर न्यूझीलंडच्या दोघा गोलंदाजांचे करिअर देखील संपवले. न्यूझीलंड संघातील सर्वात घातक गोलंदाज अशी ओळख असलेले लॉकी फर्ग्यूसन आणि ब्लेअर टिकनर यांची गिलने अशी धुलाई केली की, यापुढे त्यांची ओळख घात गोलंदाज अशी होणार नाही.

गिलच्या वादळी फलंदाजीमुळे दोघांनी १३ पेक्षा अधिक इकॉनमीने धावा दिल्या. हे दोघेही फलंदाज त्याच्या करिअरमध्ये भारताविरुद्धचा तिसरा सामना कधीच लक्षात ठेवणार नाहीत. जगभरातील फलंदाजांमध्ये दहशत निर्माण करणाऱ्या या दोन्ही गोलंदाजांच्या करिअरची चर्चा होईल तेव्हा अहमदाबाद येथे झालेल्या सामन्याचा विषय निघेलच.

लॉकी फर्ग्यूसनने ४ षटकात ५४ धावा दिल्या, त्याला एकही विकेट मिळाली नाही. तर टिकनरने ३ षटकात ५० धावा दिल्या. या शिवाय बेन लिस्टरने ४ षटकात ४२ धावा दिल्या. ज्या मैदानावर न्यूझीलंडच्या गोलंदाजांची धुलाई झाली. त्याच पिचवर भारतीय गोलंदाजांनी मात्र धारधार गोलंदाजी केली. हार्दिक पंड्याने ४ षटकात १६ धावा देत ४ विकेट घेतल्या. अर्शदीपने ३ षटकात १६ धावा देत २ विकेट घेतल्या. उमरान मलिकने २.१ षटकात ९ धावा देत २ विकेट तर शिवम मावने २ षटकात १२ धावा देत २ विकेट घेतल्या.

या सामन्यात शतक करणाऱ्या शुभमन गिलने अनेक विक्रम केले. क्रिकेटच्या तिनही फॉर्मेटमध्ये शतक करणारा तो पाचवा भारतीय फलंदाज ठरला. त्याच्या आधी सुरेश रैना, रोहित शर्मा, विराट कोहली आणि केएल राहुल यांनी अशी कामगिरी केली आहे. गिलचे टी-२० मधील शतक २३ वर्ष १४६व्या दिवशी आले. टी-२०मध्ये सर्वात कमी वयात शतक करणारा तो भारतीय ठरला आहे. हा विक्रम रैनाच्या नावावर होता. त्याने २३ वर्ष १५६व्या दिवशी टी-२० मध्ये शतक केले होते. भारताकडून टी-२० मध्ये झालेली वैयक्तीक खेळाडूची सर्वोच्च धावसंख्या ठरली. हा विक्रम विराटच्या नावावर होता. त्याने गेल्या वर्षी अफगाणिस्तानविरुद्ध नाबाद १२२ धावा केल्या होत्या.