‘मेट्रो मॅन’ म्हणून प्रसिद्ध असलेले ९० वर्षीय ई. श्रीधरन यांनी आता सक्रिय राजकारणात रस नसल्याचे म्हटले आहे. केरळच्या विधानसभा निवडणुकीत पलक्कड मतदारसंघातून त्यांनी भाजपच्या तिकिटावर निवडणूक लढवली होती पण त्यांचा पराभव झाला होता. राज्यात भाजपला एकही जागा जिंकता आली नाही.
“मी सक्रीय राजकारणात आता येणार नाही. तो काळ निघून गेला आहे. मी राजकारण सोडले नाही, पण मला यापुढे धावण्यात रस नाही. मी ९० वर्षांच्या वयात आहे,” असे त्यांनी माध्यमांशी बोलताना सांगितले. ते पुढे म्हणाले की ते राजकारणी नव्हते आणि नोकरशहा म्हणून राजकारणात आले होते. राजकारणाच्या पलीकडे जाऊनही मी तीन ट्रस्टच्या माध्यमातून लोकांची सेवा करत आहे, असे ते म्हणाले.
निवडणुकीतील पराभवानंतर आपण “थोडेसे निराश” झाल्याचे त्यांनी मान्य केले. “पण आता जेव्हा मी मागे वळून पाहतो तेव्हा माझी निराशा होत नाही. कारण एकटा आमदार म्हणून मी काहीही करू शकलो नसतो. राज्यात सत्तेशिवाय एक आमदार काहीही करू शकत नाही”, श्रीधरन म्हणाले. पलक्कड मतदारसंघातून काँग्रेसचे विद्यमान आमदार शफी पारंबिल यांच्याकडून त्यांचा पराभव झाला.
ई श्रीधरन यांना भाजपने मुख्यमंत्रिपदाचे उमेदवार म्हणून रिंगणात उतरवले होते, परंतु विधानसभेच्या निवडणुकीत पक्षाला एकही जागा जिंकता आली नाही ज्यामुळे सीपीआय(एम) च्या नेतृत्वाखालील डाव्या लोकशाही आघाडीने सलग दुसऱ्यांदा पुन्हा सत्तेत प्रवेश केला.
श्रीधरन हे भाजपच्या निवडणूक प्रचारादरम्यान स्टार उमेदवार होते.