‘आमचंही हेलिकॉप्टर ढगात सापडलं होतं, मी पायलटला सांगितलं की…’; पवारांनी सांगितला थरारक अनुभव!
‘आमचंही हेलिकॉप्टर ढगात सापडलं होतं, मी पायलटला सांगितलं की…’; पवारांनी सांगितला थरारक अनुभव!
भारतीय संरक्षण दलाचे प्रमुख बिपीन रावत यांचे हेलिकॉप्टर दुर्घटनेत निधनानंतर राष्ट्रवादी काँग्रेसचे अध्यक्ष शरद पवार यांनी श्रद्धांजली वाहिली आहे. रावत यांच्या अपघाती निधनानं देशाचं मोठं नुकसान झालं आहे. जनरल बिपिन रावत यांच्या निधनाची बातमी ऐकून धक्का बसला आणि अतिशय दु:ख झाले. रावत यांची सैन्य दलातील कारकीर्द अतिशय उत्कृष्ट होती. गेल्या चार दशकांतील त्यांची संरक्षण क्षेत्रातील सेवा आणि कार्य नेहमीच स्मरणात राहील. ही दुर्दैवी घटना देशाच्या दृष्टीने अतिशय दु:खदायक, चिंताजनक आणि काळजी करायला लावणारी आहे असं शरद पवार म्हणाले.
यावेळी पवारांनी त्यांच्यासोबत हेलिकॉप्टरचा घडलेला प्रसंग व व्यक्तीगत अनुभव देखील सांगितला. “एक दिवस पुण्याहून मुंबईला हेलिकॉप्टरने जात असताना, त्यावेळी माझी पत्नी आणि एक राज्यमंत्री माझ्यासोबत होते. तेव्हा लोणावळा नंतर खोपोलीकडे जाताना एक व्हॅली आहे. या व्हॅलीत अनेकदा ढग असतात. आमचे हेलिकॉप्टर तिथून जात असताना ढगात आम्ही सापडलो आजुबाजूचं काही दिसत नव्हतं खूप वारा होता त्यामुळे आमचं हेलिकॉप्टर पुढे जाण्यास मर्यादा आल्या होत्या. पण मला साधारणपणे संपूर्ण महाराष्ट्राची भौगोलिक माहिती असल्यामुळे मी पायलटला सांगितले, महाराष्ट्रात कळसूबाई हे सर्वात उंच शिखर आणि ते ५ हजार फुटाच्या वर उंच नाही. जर आपण ७ हजार फूट उंचीवर गेलो तर काही अडथळा येणार नाही व हेलिकॉप्टर धडकण्याची शक्यताही नाही. त्यामुळे ढगांचा अडथळा पार करुन सुखरुपपणे आम्ही उतरू शकलो. आम्ही तिथे काळजी घेतली नसती तर ते हेलिकॉप्टर व्हॅलीमध्ये कुठेतरी आदळलं असतं असं शरद पवारांनी सांगितलं.
चीफ ऑफ डिफेन्स स्टाफ जनरल बिपीन रावत हे बुधवारी दुपारी ३ वाजता हवाई दलाच्या Mi-17VH हेलिकॉप्टरमधून नियोजित ठिकाणी व्याख्यान देण्यासाठी तामिळनाडूमधील कुन्नूर जिल्ह्यातील डिफेन्स सर्व्हिसेस स्टाफ कॉलेज, वेलिंग्टन येथे जात होते. हेलिकॉप्टरने सुलूर एअरबेसवरून उड्डाण केले होते आणि ते वेलिंग्टनला जात असताना यादरम्यान या हेलिकॉप्टरचा अपघात झाला. या अपघाताचे कारण शोधण्यासाठी लष्कराने चौकशीचे आदेश दिले आहेत.