समीर वानखेडे यांच्या जात पडताळणी बाबत मिळाली धक्कादायक माहिती! माहिती अधिकारातून माहिती उघड

पुणे | मुंबई एनसीबीचे विभागीय आयुक्त समीर वानखेडे (Mumbai NCB Zonal Director Sameer Wankhede) या प्रकरणावर एक नवी माहिती समोर आली आहे. पुणे जिल्ह्यातील बारामतीचे आरटीआय कार्यकर्ते नितीन यादव यांनी शासनाच्या मुंबई जात पडताळणी समितीला माहिती अधिकाराद्वारे पत्र पाठवून याबाबत माहिती मागितली होती. त्याची माहिती प्रशासनाकडून देण्यात आली आहे. समीर ज्ञानदेव वानखेडे या नावाने जात पडताळणीच झाली नसल्याचे त्यातून समोर आले आहे.

समीर वानखेडे यांच्या वडिलांचं नाव ज्ञानदेव नसून दाऊद (Dawod) असं आहे, असा आरोप राष्ट्रवादी काँग्रेसचे प्रवक्ते व अल्पसंख्याक मंत्री नवाब मलिकांनी केला होता. त्याबाबतचे काही पुरावे देखील मलिकांनी सोशल मीडियावर (Social Media) शेअर केले होते. पण वानखेडे कुटुंबाने ते आरोप फेटाळले होते. संबंधित प्रकरण सध्या न्यायप्रविष्ट आहे.

त्यामुळे वानखेडे यांनी नोकरीत रुजू होताना कोणते प्रमाणपत्र सादर केले? यावर मोठे प्रश्नचिन्ह निर्माण झाले आहे. नितीन यादव यांनी यावर आपली प्रतिक्रिया दिली आहे “राज्य सरकारच्या सामाजिक न्याय व विधी विभागामार्फत मी गेल्या दीड महिन्यांपूर्वी एक ऑनलाईन आरटीआय अर्ज केला होता. त्या आरटीआयमध्ये अशी माहिती मागवली होती की, समीर ज्ञानदेव वानखेडे या नावाने त्यांच्याकडे कोणते जात पडताळणी प्रमाणपत्र संबंधित कार्यालयातून दिले गेले आहे का?जर दिले गेले असल्यास त्याच्या साक्षीच्या प्रती मिळाव्यात. त्यावर मला आज एक धक्कादायक माहिती जिल्हा जातपडताळणी प्रमाणपत्र समिती मुंबई कार्यालयाकडून मिळाली”, असं नितीन यादव यांनी सांगितलं.

“संबंधित समितीमार्फत समीर ज्ञानदेव वानखेडे या नावाने कोणतीही कास्ट वॅलिडिटी प्रमाणपत्र तयार केलेलं नाही, असं स्पष्ट करण्यात आलं आहे. जर समीर ज्ञानदेव वानखेडे नावाची व्यक्ती राज्य सरकार किंवा केंद्र सरकारच्या सेवेत असेल तर त्या व्यक्तीने जात पडताळणी प्रमाणपत्र जमा केलं आहे की नाही? जर त्यांनी प्रमाणपत्र सादर केलं आहे तर ते कोणत्या नावाने? हा देखील महत्त्वाचा प्रश्न आहे”, अशी प्रतिक्रिया नितीन यादव यांनी दिली.