रुढींना फाटा, विधवा प्रथा निर्मूलनासाठी झटणाऱ्या माऊलीचे देहदान, चांदगुडेंचं स्तुत्य पाऊल
जुन्या रुढी परंपरा आणि कर्मकांडांना फाटा देत आईच्या मृतदेहावर कुठल्याही प्रकारे अंत्यविधी न करता देहदान करण्याचा निर्णय लेकाने घेतला. नाशिकच्या वसंतराव पवार मेडिकल कॉलेजला महिलेचे पार्थिव सुपूर्द करण्यात आले आहे. देहदान करुन त्यांनी समाजासमोर एक अनोखा आदर्श ठेवला आहे.
नाशिक येथील महाराष्ट्र अंधश्रद्धा निर्मूलन समितीचे राज्य कार्यवाह कृष्णा चांदगुडे यांनी हा अनोखा उपक्रम केला आहे. त्यांच्या आई सुगंधाबाई त्र्यंबक चांदगुडे यांचे वयाच्या ८३ व्या वर्षी निधन झाले. आजारपणामुळे गुरुवारी त्यांनी अखेरचा श्वास घेतला. चांदगुडे यांनी आईचे मरणोत्तर देहदान केले. त्यांचा देह डॉ. वसंतराव पवार मेडिकल कॉलेजला सुपूर्द करण्यात आला आहे.
सुगंधाबाई चांदगुडे यांचे कोणत्याही प्रकारचे श्राद्ध, दशक्रिया विधी यासारखे कार्यक्रम करणार नाही अशी माहिती कृष्णा चांदगुडे यांनी दिली आहे. त्याचप्रमाणे मृत्यूनंतर चालणाऱ्या पूजा विधींचा कुठलाही खर्च न करता तो शाळेसाठी देण्याचा निर्णय चांदगुडे कुटुंबाने घेतला आहे.
सुगंधाबाई यांची आदरांजली सभा दि. १२ फेब्रुवारी रोजी त्यांच्या मूळ गावी चासनळी, ता. कोपरगाव येथे होणार आहे. यावेळी ‘देहदान व अवयवदान, काळाची गरज’ या विषयावर अवयवदान चळवळीचे कार्यकर्त सुनील देशपांडे (उपाध्यक्ष, फेडरेशन ऑफ ऑर्गन अ‍ॅन्ड बॉडी डोनेशन, मुंबई) यांचे व्याख्यान होणार आहे. यावेळी मरणोत्तर देहदानाची इच्छा असणाऱ्या व्यक्तींचे फॉर्म भरून घेणार असल्याचे कृष्णा चांदगुडे यांनी सांगितले आहे.
चांदगुडे कुटुंबीयांनी याआधी देखील समाजाला आदर्श घालून देणारे अनेक निर्णय घेतले आहे. विधवा प्रथा निर्मूलनाचे शासनाने परीपत्रक काढल्यानंतर महाराष्ट्रात प्रथमच सुगंधाबाई यांनी त्याची अंमलबजावणी केली होती. विधवा असूनही त्यांनी टिकली मंगळसूत्र, जोडवे परिधान केले होते. आता कृष्णा चांदगुडे यांनी जुन्या रूढी परंपरा आणि कर्मकांडाला फाटा देत आईचे देहदान केले आहे. त्यामुळे चांदगुडे कुटुंबाने पुन्हा एकदा समाजात देहदानाची जनजागृती केली असून समाजाला आदर्श घालून दिला आहे.