धक्कादायक! अदृश्य योगी व्यक्तीच्या सांगण्यावरुन NSE च्या CEO नी घेतले निर्णय
NSE म्हणजेच नॅशनल स्टॉक एक्सचेंज हे भारतातील सर्वात मोठे स्टॉक एक्सचेंज आहे. भारतातील सर्वात मोठ्या स्टॉक एक्स्चेंजचे एकत्रित बाजार भांडवल सुमारे चार ट्रिलियन डॉलर्स आहे आणि सिक्युरिटीज अँड एक्सचेंज बोर्ड ऑफ इंडिया (SEBI) ने या चार ट्रिलियन डॉलर्सच्या एकत्रित स्टॉक एक्सचेंजबद्दल धक्कादायक खुलासे केले आहेत. सेबीच्या अधिकाऱ्याच्या म्हणण्यानुसार, NSE च्या माजी MD आणि CEO चित्रा रामकृष्ण यांनी कधीही न पाहिलेल्या योगीच्या सांगण्यावरून NSE शी संबंधित निर्णय घेतले. चित्रा रामकृष्ण हिमालयात राहणार्‍या योगींनी प्रभावित झाले होते, योगींच्या सांगण्यावरून आनंद सुब्रमण्यम यांना ग्रुप ऑपरेटिंग ऑफिसर आणि एक्सचेंजचे व्यवस्थापकीय संचालक यांचे सल्लागार म्हणून नियुक्त केले. रामकृष्ण आणि इतरांविरुद्ध शुक्रवारी जारी केलेल्या अंतिम आदेशात सेबीने हा खुलासा केला आहे.
सेबीने रामकृष्ण आणि इतरांवर दंडही ठोठावला. सुब्रमण्यन यांच्या नियुक्तीमध्ये सिक्युरिटीज कराराच्या नियमांचे उल्लंघन केल्याबद्दल हा दंड ठोठावण्यात आला आहे. आनंद सुब्रमण्यम यांची समूहाचे कार्यकारी अधिकारी आणि व्यवस्थापकीय संचालक (MD) चे सल्लागार म्हणून नियुक्ती करताना सिक्युरिटीज कराराच्या नियमांचे उल्लंघन झाल्याच्या पार्श्वभूमीवर नियामकाने हे पाऊल उचलले आहे. रामकृष्ण एप्रिल 2013 ते डिसेंबर 2016 पर्यंत NSE चे MD आणि CEO होते. ती साधू व्यक्ती एक आध्यात्मिक शक्ती आहे असं चित्रा रामकृष्ण मानतात आणि गेली 20 वर्षे या व्यक्तीने त्यांना वैयक्तिक आणि व्यावसायिक गोष्टींवर मार्गदर्शन केले आहे. रामकृष्ण यांच्या म्हणण्यानुसार, ही अज्ञात व्यक्ती किंवा योगी कथितरित्या एक अध्यात्मिक शक्ती होती, जी त्यांना पाहिजे तिथे दिसू शकते. सेबीने आपल्या 190 पानांच्या आदेशात या योगी व्यक्तीने रामकृष्ण याना सुब्रमण्यम यांची नियुक्ती करण्याचे निर्देश दिल्याचे असे म्हंटले आहे .
या प्रकरणी कारवाई करत सेबीने रामकृष्ण आणि सुब्रमण्यन तसेच NSE आणि त्यांचे माजी व्यवस्थापकीय संचालक आणि मुख्य कार्यकारी अधिकारी रवी नारायण आणि इतरांना दंड ठोठावला आहे. नियामकाने रामकृष्ण यांना ३ कोटी रुपये, नॅशनल स्टॉक एक्सचेंज (NSE), नारायण आणि सुब्रमण्यन यांना प्रत्येकी २ कोटी रुपये आणि व्ही आर नरसिम्हन यांना ६ लाख रुपये दंड ठोठावला आहे. यासोबतच नियामकाने NSE ला सहा महिन्यांसाठी कोणतेही नवीन उत्पादन सादर करण्यास मनाई केली आहे. याशिवाय, रामकृष्ण आणि सुब्रमण्यन यांना तीन वर्षांच्या कालावधीसाठी कोणत्याही मार्केट इन्फ्रास्ट्रक्चर संस्थेशी किंवा सेबीमध्ये नोंदणीकृत कोणत्याही मध्यस्थांशी संबंध ठेवण्यास मनाई करण्यात आली आहे. तर नारायण यांच्यासाठी हे बंधन दोन वर्षांसाठी आहे. याशिवाय, SEBI ने NSE ला 1.54 कोटी रुपयांचा स्थगित बोनस आणि रामकृष्णला अतिरिक्त रजेच्या बदल्यात दिलेले 2.83 कोटी रुपये जप्त करण्याचे निर्देश दिले.