शिवनेरी ट्रेकर्स चे अध्यक्ष निलेश खोकराळे व त्यांचे साथीदार अनिल काशिद यांच्यासोबत रविवारी भीमाशंकर जवळील पदरगडचा ट्रेक आम्ही पूर्ण केला. कठीण श्रेणीतील गडांमध्ये गणला जाणारा हा एक गड ”. ट्रेक नियोजनात ठरल्याप्रमाणे पहाटे पाच वाजता आम्ही सर्वजण तयार झालो. पण ऐनवेळी समजले की आमच्यातील दोन जणांना येणे शक्य नाहीये. मग त्यांच्या ऐवजी दुसऱ्या दोन जणांना घेतले व ट्रेकला एक तास उशिरा का होईना सुरुवात झाली. सकाळी ठीक सहा वाजता आम्ही पदरगड कडे निघालो. 
साडे आठ वाजता आम्ही भीमाशंकरला पोहोचलो. बारा ज्योतिर्लिंगांपैकी एक व दिवाळीची सुट्टी व रविवार यामुळे प्रचंड गर्दी होती. आम्ही मंदिराजवळ गाडी लावून मुंबई पॉईंटच्या बाजूने खाली उतरण्यास सुरुवात केली. सह्याद्रीच्या पर्वतरांगा व भीमाशंकरच्या जंगलातील असणारे वन्यजीव अभयारण्य व दूरवर दिमाखात उभा असणारा पदरगड हे सर्व निसर्ग सौंदर्य सकाळच्या त्या अतिशय प्रसन्न वातावरणात जणू आम्हाला खुणावत होते. थंडीही बऱ्यापैकी होती. आम्ही ट्रेकला साडे आठ वाजता सुरुवात केली. कोणीही न्याहारी न केल्यामुळे साडेदहा वाजता सोबत आणलेल्या डब्याचा निसर्गाच्या सानिध्यात बसून आनंद घेतला व परत ट्रेकला सुरुवात केली.
घनदाट झाडीतून रस्ता असल्यामुळे ऊन अजिबात जाणवत नव्हते. दुर्मिळ होत चाललेल्या शेकरूची घरे उंच झाडावर पाहायला मिळाली. ते जंगल ओलांडून आम्ही डोंगर उतरलो. मुंबई मार्गे येणारे ट्रेकर्स खांडसगाव मार्गे गणेश घाटातून येतात. पदरगड चढताना मध्ये एक विहीर लागली. पाणी स्वच्छ असल्यामुळे रिकाम्या बाटल्या भरून घेऊन आम्ही पुढे निघालो. अनेक वनौषधी उपलब्ध असलेले हे अभयारण्य आम्ही पार केले. गड सर करताना दोरीच्या सहाय्याने एक अवघड चढाई पार करून आम्ही चिमणी क्लाइंबिंग पॉईंटला पोहोचलो. अतिशय चिंचोळ्या जागेतून एका वेळी दोन जण उभे राहतील व एकच जण एकावेळी चढून जाऊ शकेल अशा अगदी चिंचोळ्या जागेतून पुढे जाऊन दोरीच्या साहाय्याने पायाचा व पाठीचा पूर्ण उपयोग करून वर चढायचे होते. मुंबईवरून येणारे दोन गट आम्हांला तेथे भेटले. एक भीमाशंकरचा डोंगर उतरताना तर दुसरा चिमणी पॉईंटला. सरांनी वर जाऊन दोर लावला व आम्ही एक एक जण वर चढलो. खालून काशीद सर आम्हाला मदत व मार्गदर्शन करीत होते. दोन खडकांच्या शिखरांमुळे पदरगडला कलावंतीणीचा महाल असेही म्हटले जाते. समुद्रसपाटीपासून २२०० फूट उंच आहे. किल्ला कोणी बांधला याबद्दल जास्त माहिती नाही पण मावळ प्रांतावर लक्ष ठेवण्यासाठी हा एक टेहळणी किल्ला म्हणून हा किल्ला वापरला जाई. यानंतर तिसरा एक कातळ टप्पा लागतो तिथे दोराचा वापर करून आम्ही वर चढलो.
भीमाशंकर ची पूर्ण डोंगररांग इथून दिसते. गड चढताना शेवटी पायऱ्या लागतात त्यानंतर आपण गडावर पोहोचतो. गडावर पाण्याच्या तीन टाक्या, मंदिराचे अवशेष पाहायला मिळतात. गडावरून पदरवाडी गाव पाहायला मिळते. या गावावरूनच गडाचे नाव पदरगड असे पडले. गडावरून भीमाशंकरचा डोंगर, पेठ चा किल्ला, माथेरानची डोंगररांग, सिद्धगड, तुंग किल्ला पाहायला मिळतात. गडावरील प्रसिद्ध ठिकाण म्हणजे गडावर असणारी गुहा या गुहेत बसून आम्ही विश्रांती घेतली व परतीचा प्रवास चालू केला. दुपारी दोन वाजता आम्ही परतीच्या प्रवासाला सुरुवात केली. ऊन खूप वाढल्यामुळे आम्ही मधल्या नागफणी डोंगररांगेने कडेकडेने सावलीतून दोन मोठे टप्पे पार करून वर भीमाशंकरच्या सपाट पठारी भागावर पोहोचलो. या दरम्यान मानवी स्पर्श नसलेले शुद्ध झऱ्याचे पाणी प्यायला मिळाले. लहान मुले सोबत असल्याने एकदा छोटी विश्रांती घेऊन आम्ही पुढे निघालो. येळवली मार्गे आम्ही गुप्त भीमाशंकरला आलो. जाताना अनेक वेगवेगळी रानफुले पाहायला मिळाली व कास पठाराची आठवण झाली. भीमा नदीचा उगम पाहून आम्ही अगदी वीस मिनिटात मंदिरापाशी पोहोचलो. संध्याकाळी साधारण सात वाजण्याच्या सुमारास आमचा ट्रेक पूर्ण झाला. पूर्ण दिवसासाठी केलेला हा आमचा पहिलाच ट्रेक होता पण कुणाच्याही चेहऱ्यावर अजिबात थकवा जाणवत नव्हता. सगळ्यांचाच फिटनेस व व्यायामाची सवय असल्यामुळे हा ट्रेक व्यवस्थित पार पडला. तीन-चार वेळा घामाने आंघोळ होऊनही मन मात्र खूप प्रसन्न झाले होते. परत येताना पुढच्या ट्रेकचे बेत आखत आम्ही घरी पोहोचलो.
मित्रांनो, तुम्हीही या गडाला अवश्य भेट द्या परंतु माहिती असलेल्या व अनुभवी ट्रेकर्सना सोबत न्यायला विसरू नका. ट्रेक च्या नियोजनाआधी फिटनेसकडे आणि व्यायामाकडे लक्ष द्या. – डॉ. अनुष्का शिंदे (हिवरे तर्फे नारायणगाव)