राष्ट्रवादी काँग्रेस वेल्फेअर ट्रस्ट च्या माध्यमातून तमाशा कलावंतांना १ कोटी रुपयांची मदत
नारायणगाव | कोरोनाच्या पार्श्वभूमीवर राज्यातील तमाशा कार्यक्रमांवर घालण्यात आलेल्या बंदीमुळे तमाशातील कलाकारांवर बेरोजगारीचे संकट कोसळले आहे. आर्थिक संकटातून जात असलेल्या तमाशा फडमालकांनी पॅकेज जाहीर करण्याची मागणी शनिवारी पत्रकार परिषदेत केली होती. हे सर्व तमाशा कलाकार व फडमालक आंदोलनाच्या पवित्र्यात होते. या पत्रकार परिषदेत जुन्नर चे आमदार अतुल बेनके यांनी स्वतः या कलाकारांशी आणि तमाशा फडमालकांशी फोनवरून संवाद साधला होता आणि उपमुख्यमंत्री अजित पवार व गृहमंत्री दिलीप वळसे पाटील यांची भेट घेऊन यासंदर्भात चर्चा करू व या प्रश्नांवर मार्ग काढू असे आश्वासन दिले होते. त्यानुसार आज सकाळी या सर्व तमाशा फडमालकांना घेऊन आ. अतुल बेनके यांनी मुंबई येथे राष्ट्रवादी काँग्रेसचे अध्यक्ष खा. शरद पवार यांच्याशी देखील चर्चा केली. यावेळी पवारांनी या कलावंतांच्या अडचणी आणि समस्या जाणून घेतल्या. राष्ट्रवादी काँग्रेस वेल्फेअर ट्रस्ट च्या माध्यमातून राज्यातील तमाशा कलाकारांना १ कोटी रुपयांची मदत देण्याचे जाहीर केले. प्रत्येक कलाकाराला ३ हजार रुपये याप्रमाणे राज्यातील ३ हजार कलाकारांना आर्थिक मदत शरद पवारांकडून जाहीर करण्यात आली. यानंतर आ. बेनके व तमाशा फडमालकांनी उपमुख्यमंत्री अजित पवार व गृहमंत्री दिलीप वळसे पाटील यांच्या समवेत तमाशा कार्यक्रमांवर असलेल्या बंदी संदर्भात चर्चा केली. येत्या १ फेब्रुवारी पासून ५०% प्रेक्षक उपस्थितीत राज्यात तमाशा कार्यक्रमांना परवानगी देण्यात येईल असे अजित पवारांनी यावेळी सांगितले. तसेच स्व.विलासराव देशमुख यांनी तमाशा कलावंतांसाठी चालू केलेला निधी मार्च २०२२ मध्ये देण्यात येईल असे अर्थमंत्री अजित पवार यांनी आश्वस्त केले. या चर्चेनंतर जेष्ठ कलावंत व तमाशा फडमालक रघुवीर खेडकर आणि मंगलाताई बनसोडे यांनी आंदोलन मागे घेण्याची घोषणा केली.
तमाशा हि महाराष्ट्राची पारंपारिक लोककला आहे. या लोककलेचा ठेवा जपण्यासाठी राज्यातील तमाशा कलावंतांच्या मागे भक्कमपणे उभं राहणं गरजेचं आहे अशी भावना आ.अतुल बेनके यांनी यावेळी व्यक्त केली. या बैठकीला जेष्ठ कलावंत व फड मालक रघुवीर खेडकर, राष्ट्रपती पुरस्कार विजेत्या मंगलाताई बनसोडे, राष्ट्रवादी काँग्रेस सांस्कृतिक विभागाचे पुणे जिल्हा उपाध्यक्ष मोहित नारायणगावकर, अविष्कार मुळे, मुसाभाई इनामदार आदी तमाशा कलाकार प्रतिनिधी उपस्थित होते.