स्वतःच्या लोकप्रियतेमुळे नव्हे तर, प्रामाणिक कार्यकर्त्यांमुळे तुम्ही खासदार याचं भान ठेवा… आ. मोहितेंकडून खा. कोल्हेंना कानपिचक्या

“स्वतःच्या लोकप्रियतेमुळे नव्हे तर, राष्ट्रवादी काँग्रेसच्या निष्ठावान, प्रामाणिक कार्यकर्त्यांमुळे तुम्ही खासदार आहात याचे भान असू द्या”, अशा भाषेत खेडचे राष्ट्रवादीचे आमदार दिलीप मोहिते पाटील यांनी राष्ट्रवादी काँग्रेसचे खा.डॉ.अमोल कोल्हे यांना कानपिचक्या दिल्या.

आगामी निवडणुकांच्या पार्श्वभूमीवर खेड तालुका राष्ट्रवादी काँग्रेसच्या कार्यकर्त्यांचा मेळावा रविवारी (दि.५) वाकी येथे आयोजित करण्यात आला होता. या मेळाव्यात आ.मोहिते बोलत होते.

आमदार दिलीप मोहिते पाटील म्हणाले, “खेड तालुक्यातील निर्णय घेताना विचारात घेतले जात नाही. तालुक्यात परस्पर येऊन कार्यक्रम करता आणि ज्यांनी जीवाचं रान करून निवडून आणले, त्या कार्यकर्त्यांना सोडून विरोधकांना बरोबर घेता, हे बरं नाही. समाजकारण हे ‘युट्यूब’, ‘फेसबुक’वर पोस्ट टाकण्याएवढे सोपे नाही. ज्यासाठी तुम्हांला मते दिली त्या लोकांची काम करा. सर्वसामान्य लोकांपर्यंत या”, असा सल्लाही खा. कोल्हे यांना आमदार मोहिते यांनी दिला.

या मेळाव्याला जिल्हा बँकेचे मतदार प्रतिनिधी, जिल्हा परिषदेच्या अध्यक्षा निर्मलाताई पानसरे, सुरेखाताई मोहिते, अरुण चांभारे, अनिलबाबा राक्षे, राष्ट्रवादीचे तालुकाध्यक्ष कैलास सांडभोर, अशोक राक्षे, बाजार समितीचे सभापती विनायक घुमटकर, पंचायत समितीचे सभापती अरुण चौधरी, उपसभापती वैशाली गव्हाणे, पीएमआरडीए मंडळ संचालक वसंत भसे, खरेदी विक्री संघाचे अध्यक्ष राजाराम लोखंडे, राजगुरूनगर बँकेचे उपाध्यक्ष अरुण थिगळे, नवनाथ होले, सुभाष होले आदी उपस्थित होते. कैलास मुसळे यांनी सूत्रसंचालन केले.