कुकडी प्रकल्पाअंतर्गत धरणांतून रब्बी हंगामासाठी १ जानेवारीपासून आवर्तन

कुकडी प्रकल्पाअंतर्गत धरणांतून रब्बी हंगामासाठी १ जानेवारीपासून आवर्तन

पुणे |  कुकडी प्रकल्पातील धरणांमधून रब्बी हंगामातील पिकांच्या सिंचनासाठी कालवा सल्लागार समितीची बैठक जलसंपदा मंत्री जयंत पाटील यांच्या अध्यक्षतेखाली शनिवारी (दि.०४) रोजी पार पडली. या बैठकीमध्ये १ जानेवारीपासून कुकडी डावा कालव्यात तर २५ डिसेंबरपासून डिंभे उजवा कालवा, घोड शाखा कालवा व पिंपळगाव जोगे कालव्यात तर मिना शाखा कालव्यात २० डिसेंबरपासून पाणी सोडण्याचा निर्णय घेण्यात आला.

कुकडी प्रकल्पामध्ये ३ डिसेंबर २०२१ रोजी २३.८९ टीएमसी (८०.५१ टक्के) इतका पाणीसाठा उपलब्ध आहे. या पाण्यातून बाष्पीभवन, पिण्याचे पाणी, आरक्षण, विभागणी साठा इत्यादीसाठी लागणारे पाणी वजा करता रब्बी हंगाम नियोजनासाठी १५.२० टीएमसी पाणी उपलब्ध आहे.

उपलब्ध पाण्यातून प्रकल्पातील कालवानिहाय रब्बी आवर्तन सुरू करण्याच्या तारखाही या बैठकीमध्ये ठरविण्यात आल्या. कुकडी डावा कालवा १ जानेवारी २०२२, डिंभे उजवा कालवा, घोड शाखा कालवा, पिंपळगाव जोगे डावा कालवा २५ डिसेंबर २०२१ व मिना शाखा कालव्यातून २० डिसेंबर २०२१ रोजी आवर्तन सुरू करण्यात येईल. याबरोबरच डिंभे डावा कालवा, मिना पुरक कालवा हे कालवे आणि कुकडी, मिना व घोड नदीवरील कोल्हापूरी पद्धतीचे बंधाऱ्याचे आवर्तन आवश्यकतेनुसार सोडण्याचाही निर्णय या बैठकीत घेण्यात आला.

सिंचनभवन पुणे येथे झालेल्या बैठकीला आ. अशोक पवार, आ.रोहित पवार, आ.अतुल बेनके, आ.संजय शिंदे, आ.बाळासाहेब आजबे, दूरदृश्य प्रणालीद्वारे आ. बबनराव पाचपुते आदी लोकप्रतिनिधी उपस्थित होते.

कुकडी प्रकल्पातील कालव्यांची “माझा कालवा माझी जबाबदारी” उपक्रमांतर्गत स्वच्छता केल्याने कालव्यांची वहनक्षमता वाढली आहे. अशा परिस्थितीत आवर्तनादरम्यान पुरेशा दाबाने पाणी मिळणार असल्याने सर्व शेतकऱ्यांनी या पाण्याचा उपयोग काटकसरीने व कार्यक्षमतेने करावा, असे आवाहन जलसंपदामंत्री जयंत पाटील यांनी केले. कुकडी सिंचन मंडळाचे अधीक्षक अभियंता सं. मा. सांगळे यांनी सादरीकरणाद्वारे माहिती दिली.

या बैठकीला कालवा सल्लागार समितीचे सदस्य घनश्याम शेलार, देवदत्त निकम, अशोक घोडके,सुदाम पवार, कृष्णा खोरे विकास महामंडळाचे कार्यकारी संचालक विलास राजपूत, मुख्य अभियंता हेमंत धुमाळ, हनुमंत गुणाले, अधीक्षक अभियंता सं. मा. सांगळे, उपायुक्त नंदीनी आवडे, उपजिल्हाधिकारी वनश्री लाभशेटवार, कर्जतचे प्रांताधिकारी डॉ. अजित थोरबोले, जिल्हा अधिक्षक कृषि अधिकारी ज्ञानेश्वर बोटे आदी उपस्थित होते.