Kasba Peth Bypoll: कसबा पोटनिवडणुकीत अभिजित बिचुकलेंची एन्ट्री, पत्नीने उमेदवारी अर्ज नेला

आमदारकी, खासदारकीपासून ते अगदी राष्ट्रपतीपदाच्या निवडणुकीच्या रिंगणात उतरुन कायमच सर्वांचे लक्ष वेधून घेणारे बिग बॉस फेम अभिजित बिचुकले पुन्हा एकदा चर्चेत आले आहेत. अभिजित बिचुकले यांनी कसबा पेठ पोटनिवडणुकीत उतरण्याचे संकेत दिले आहेत. भाजप आमदार मुक्ता टिळक यांच्या निधनामुळे कसबा मतदारसंघाची जागा रिक्त झाली होती. या जागेसाठी येत्या २६ फेब्रुवारीला मतदान होणार आहे, तर २ मार्चला निकाल जाहीर होणार आहे. सध्या कसबा पेठ आणि चिंचवड पोटनिवडणुकीच्या उमेदवारी अर्जाचे वाटप सुरु आहे. भाजपकडून ही पोटनिवडणूक बिनविरोध करण्यासाठी प्रयत्न सुरु आहेत. मात्र, महाविकास आघाडीतील काँग्रेस आणि राष्ट्रवादी हे दोन्ही पक्ष या जागेवरुन लढण्यास उत्सुक आहेत. त्यामुळे कसबा पेठ पोटनिवडणूक रंगतदार होण्याची शक्यता आहे. अशात अभिजित बिचुकले रिंगणात उतरल्यास ही पोटनिवडणूक आणखीनच गाजण्याची शक्यता आहे.

अभिजित बिचुकले यांच्या पत्नी अलकृंता बिचुकले यांनी शुक्रवारी पोटनिवडणुकीसाठी उमेदवारी अर्ज विकत घेतला. त्यामुळे आता अभिजित बिचुकले पोटनिवडणूक लढतील, अशी चर्चा सुरु झाली आहे. अभिजित बिचुकले हे सातत्याने त्यांचा फॅशन सेन्स, स्टाईल आणि बेधडक वक्तव्यांमुळे चर्चेत असतात. काही दिवसांपूर्वी पुण्यात अभिजित बिचुकले यांच्या गाडीचा अपघात झाला होता. यामध्ये अभिजित बिचुकले यांच्या डोक्याला दुखापत झाली होती. मात्र, प्राथमिक उपचारानंतर त्यांना रुग्णालयातून डिस्चार्ज मिळाला होता. यानंतर अभिजित बिचुकले यांनी सोशल मीडियाच्या माध्यमातून चाहत्यांशी संवाद साधत आपली प्रकृती स्थिर असल्याचे सांगितले होते.

यापूर्वी २०१९ मध्ये अभिजित बिचुकले यांनी मुंबईच्या वरळी विधानसभा मतदारसंघातून आदित्य ठाकरे यांच्याविरोधात निवडणूक लढवली होती. तेव्हादेखील अभिजित बिचुकले यांनी जोरदार प्रचार करत सर्वांचे लक्ष वेधून घेतले होते. मात्र, या निवडणुकीत अभिजित बिचुकले यांचे डिपॉझिट जप्त झाले होते.