घरगुती एलपीजी सिलेंडरचे वजन कमी करण्याचा सरकारचा विचार

नवी दिल्ली | घरगुती एलपीजी सिलेंडरच्या वजनामुळे होणार्‍या समस्या पाहता सरकार सिलेंडरचे वजन कमी करण्याचा विचार करत आहे. घरगुती स्वयंपाकाच्या गॅस (एलपीजी) सिलेंडरच्या 14.2 किलो इतक्या वजनामुळे महिलांना त्याच्या वाहतुकीत अडचणी येतात. हे लक्षात घेऊन त्याचे वजन कमी करण्यासह विविध पर्यायांवर सरकार विचार करत आहे. पेट्रोलियम आणि नैसर्गिक वायू मंत्री हरदीप सिंग पुरी यांनी राज्यसभेत प्रश्नोत्तराच्या तासादरम्यान पुरवणी प्रश्नांना उत्तर देताना ही माहिती दिली.

यापूर्वी एका राज्यसभा सदस्याने सिलेंडर जड असल्याने महिलांना होणाऱ्या त्रासाचा उल्लेख केला होता. याला उत्तर देताना पुरी म्हणाले, “महिला आणि मुलींनी सिलेंडरचे वजन स्वतःहून उचलावे अशी आमची इच्छा नाही. तरीही आम्ही त्याचे वजन कमी करण्याचा विचार करत आहोत.” ते पुढे म्हणाले, “आम्ही यावर मार्ग काढू. 14.2 किलो वजन 5 किलो किंवा अन्य पर्यायी मार्गाने वजन कमी करण्यासाठी आम्ही प्रयत्नशील आहोत,” असे सभागृहातील गदारोळात ते म्हणाले. त्यावेळी 12 विरोधी सदस्य निलंबीत सदस्यांचे निलंबन मागे घेण्याची मागणी करत घोषणा देत होते.