चंद्रकांत पाटलांनी सांगितलं सत्तेचं गणित, 2024 ला स्वबळावर सत्ता आणणार

चंद्रकांत पाटलांनी सांगितलं सत्तेचं गणित, 2024 ला स्वबळावर सत्ता आणणार

पुणे | देशाचे गृहमंत्री आणि भाजपचे राष्ट्रीय नेते अमित शाह यांच्या पुणे दौऱ्या दरम्यान आयोजित कार्यकर्ता मेळाव्यात बोलताना भारतीय जनता पक्षाचे प्रदेशाध्यक्ष चंद्रकांत पाटील यांनी येत्या 2024 च्या निवडणुकीत महाराष्ट्रात स्वबळावर सत्ता स्थापन करणार असा विश्वास अमित शाह यांच्या समोर बोलून दाखवला. पंतप्रधान पदाचे स्वप्न पाहणाऱ्या पक्षाला जे जमलं नाही ते भारतीय जनता पक्षाने महाराष्ट्रात करून दाखवलं आहे. असे सांगत चंद्रकांत पाटील (Chandrakant Patil) यांनी नाव न घेता राष्ट्रवादी काँग्रेसचे ज्येष्ठ नेते शरद पवार (Sharad Pawar) यांच्यावर टीका केली.

यावेळी पाटील म्हणाले, देशाचे पंतप्रधान होण्याचे स्वप्न पाहणाऱ्या पक्षालाही या महाराष्ट्रात 60 च्या वर आमदार निवडून आणता आले नाही. देशात अनेक वर्ष राज्य केलेल्या काँग्रेसलाही 70 पेक्षा जास्त आमदार निवडून आणता आले नाही आणि नरेंद्र मोदींच्या नावावर मते मागून धोका देणाऱ्या शिवसेनेलाही 73 च्या वर आमदार निवडून आणता आले नाही. 2014 च्या निवडणुकीत पहिल्यांदाच एखाद्या पक्षाला 100 पेक्षा जास्त आमदार निवडून आणता आले. 2019 मध्ये देखील 105 आमदार निवडून आले. परंतु भारतीय जनता पार्टीच्या कार्यकर्त्यांनी बूथ संपर्क योजनेच्या जोरावर 100 पेक्षा अधिक आमदार निवडून आणले.

भारतीय जनता पक्ष पुण्यात बूथ संपर्क अभियान अशा प्रकारे राबवणार की ज्यामुळे संपूर्ण महाराष्ट्रात भाजपच्या कार्यकर्त्यांना एक दिशा मिळेल. महाराष्ट्रातील 98 हजार बूथवरील 30 लाख कार्यकर्त्यांनी प्रत्येकी दहा लोकांची जरी मतं मळवली तरी 3 करोड मतं भाजपला मिळतील. महाराष्ट्रात जेव्हा एखादा पक्ष दोन करोड मते घेतो तेव्हा तो 144 जागा जिंकतो. त्यामुळे आगामी निवडणुकीत आम्ही एकटे लढणार आणि 160 जागा निवडून आणणार. स्वतःच्या बळावर महाराष्ट्रात सरकार स्थापन करू असा विश्वास चंद्रकांत पाटील यांनी यावेळी व्यक्त केला.