भोसरी ते जुन्नर पीएमपीएमएलची बससेवा सुरू करा – आ.अतुल बेनके

पुणे | भोसरी ते जुन्नर या मार्गावर पीएमपीएमएलची नवीन बससेवा सुरू करण्याची मागणी पुणे महानगर परिवहन महामंडळाचे अध्यक्ष तथा व्यवस्थापकीय संचालक लक्ष्मीनारायण मिश्रा यांच्याकडे जुन्नर तालुक्याचे आमदार अतुल बेनके यांनी निवेदनाद्वारे हि मागणी केली आहे.

देशभरातून व महाराष्ट्र राज्यातून व पुणे, पिंपरी चिंचवड शहरातून मोठ्या प्रमाणावर पर्यटक हे शिवजन्मभूमी किल्ले शिवनेरी जुन्नर, नारायणगाव, ओझर, लेण्याद्री येथे ये-जा करत असतात. तसेच पुणे शहरात जाण्यासाठी जुन्नर तालुक्यातील अनेक नागरिक, कामगार व विद्यार्थी वर्ग हा खासगी वाहनाने प्रवास करत आहेत.

सध्या भोसरी ते मंचर पीएमपीएमएलची बससेवा सुरू असून या बसला प्रवाशी वर्गाचा चांगला प्रतिसाद मिळत आहे जुन्नर, नारायणगाव ही शहरे देखील झपाट्याने वाढत आहे दर रविवारी पर्यटनाच्या निमित्ताने तसेच शिवभक्त मोठ्या प्रमाणावर किल्ले शिवनेरी व इतर गडकिल्ले फिरण्यासाठी या ठिकाणी पर्यटनासाठी येत असतात तसेच अष्टविनायकांपैकी दोन स्थळे हे जुन्नर तालुक्यात असल्याने गणेशभक्त मोठ्या प्रमाणावर येत असतात. तरी पर्यटक , नागरिक व भाविक यांची गैरसोय लक्षात घेता भोसरी ते जुन्नर पीएमपीएमएलची नवीन बससेवा सुरू करण्याची मागणी मी पुणे महानगर परिवहन महामंडळाचे अध्यक्ष तथा व्यवस्थापकीय संचालक लक्ष्मीनारायण मिश्रा यांच्याकडे केली आहे असं बेनके यांनी आपल्या निवेदनात म्हंटलं आहे.