“अनिल देशमुखांनी मदत केली, तेव्हा हा प्रश्न सुटला” – नितीन गडकरी

“अनिल देशमुखांनी मदत केली, तेव्हा हा प्रश्न सुटला” – नितीन गडकरी

नागपूर – काटोल रस्त्याच्या चौपदरीकरण कामासाठी माजी गृहमंत्री अनिल देशमुख यांनी मदत केली म्हणून वन विभागाने या कामास मंजुरी दिली. अन्यथा हे काम मार्गी लागले नसते. अशा शब्दांत केंद्रीय रस्ते वाहतूक मंत्री नितीन गडकरी यांनी अनिल देशमुख यांने आभार मानले.

नागपूर ते काटोल या चौपदरी रस्त्याचे आज उद्घाटन करण्यात आले या रस्त्याचा शुभारंभ आज केंद्रीय मंत्री नितीन गडकरी व इतर मान्यवरांच्या प्रमुख उपस्थितीत झाला.

यावेळी बोलताना गडकरी म्हणाले, “या रस्त्यासाठी अनेक अडचणी आल्या. वनविभागाने हा वाघांच्या जाण्याचा मार्ग असल्याचे सांगितले. माझा जन्म तुमच्या आधी झाल्याचे मी त्या अधिकाऱ्यांना म्हटले. इतक्या वर्षात इथे कोणत्या गावात वाघ शिरला नाही तर तुम्ही कुठे घुसवत आहात. त्रास द्यायचे काम कशाला करता? त्यावेळी अनिल देशमुखांनी याकामी मदत केली व वनविभागाची परवानगी मिळवून दिली नाहीतर परवानगी मिळतचं नव्हती. या रस्त्याकरता त्यांचेही मी आभार मानतो. येणाऱ्या काळामध्ये सगळ्या अडचणी दूर करुन हा रस्ता पूर्ण होणार आहे. नागपूरमध्येही हा रस्ता चौपदरी करण्यात येणार आहे,” असे गडकरी म्हणाले.