कुंभमेळा कामांसाठी भुजबळ सरसावले; जिल्हा प्रशासनाला महत्त्वाच्या सूचना!

नाशिक, २१ ऑगस्ट: राज्याचे अन्न, नागरी पुरवठा व ग्राहक संरक्षण मंत्री छगन भुजबळ यांनी सिंहस्थ कुंभमेळ्यासाठी होणारी सर्व विकास कामे गुणवत्तापूर्ण आणि निर्धारित वेळापत्रकानुसार पूर्ण करण्यावर भर दिला आहे. त्यांनी स्पष्ट केले की, दोन वर्षांपेक्षा जास्त कालावधी लागणारी कामे तूर्त टाळण्यात यावीत. गुरुवारी जिल्हाधिकारी कार्यालयातील मध्यवर्ती सभागृहात झालेल्या आढावा बैठकीत ते बोलत होते.

मंत्री भुजबळ यांनी यावेळी सांगितले की, नाशिक येथे होणाऱ्या कुंभमेळ्यामुळे अध्यात्मिक पर्यटनाला लक्षणीय चालना मिळणार आहे. या पार्श्वभूमीवर जिल्हा प्रशासनाने सर्वांगीण नियोजन करावे. पर्यटन, आरोग्य, शैक्षणिक सुविधांच्या निर्मितीबरोबरच कृषीवर आधारित प्रक्रिया उद्योगांना चालना देण्यावर भर द्यावा. भाविकांच्या सुरक्षिततेसाठी पोलिसांनी अत्याधुनिक तंत्रज्ञानाचा वापर करावा आणि वाहतूक सुरळीत ठेवण्यासाठी पोलिस कर्मचाऱ्यांना प्रशिक्षण द्यावे.

त्यांनी नाशिक-त्र्यंबकेश्वर रस्त्याचे रुंदीकरण करण्याचे आदेश दिले. समृद्धी महामार्गाला इगतपुरीहून असलेल्या इंटरचेंज रस्त्याचे काम तातडीने पूर्ण करण्यास सांगितले. वाहतूक सुरळीत होण्यासाठी यापूर्वी केलेल्या रिंगरोडसह इतर रस्त्यांचे बळकटीकरण करण्यावर भर देण्यात आला.

कुंभमेळ्यासाठी बाहेरुन येणाऱ्या भाविकांना जिल्ह्यातील इतर अध्यात्मिक आणि पर्यटन स्थळांना भेट देता येईल यासाठी योजना आखण्याचे निर्देश दिले.
मंत्री यांनी गोदावरी नदी स्वच्छ आणि प्रदूषणमुक्त राहील यासाठी तातडीने उपाययोजना करण्याचे आवाहन केले. कुंभमेळ्यानिमित्त भाविकांची संख्या लक्षात घेऊन नाशिक-त्र्यंबकेश्वर येथे नवीन घाटांचा विकास करतानाच यापूर्वी बांधलेल्या घाटांची दुरुस्ती करावी आणि यासाठी सर्व संबंधित विभागांनी समन्वय साधावा, अशा सूचना देण्यात आल्या.

विभागीय आयुक्त डॉ. गेडाम यांनी सांगितले की, कुंभमेळा सुरक्षित, स्वच्छ आणि पर्यावरणास अनुकूल होण्यासाठी सखोल नियोजन केले आहे. त्यासाठी कुंभमेळा प्राधिकरण स्थापन करण्यात आले असून दीर्घकालीन कामे सुरू करण्याच्या सूचना देण्यात आल्या आहेत. महानगरपालिका आयुक्त, सार्वजनिक बांधकाम विभाग आणि पोलिस अधिकाऱ्यांनी त्यांच्या विभागांतर्फे सुरू असलेल्या कामांची तपशीलवार माहिती सादर केली.

जिल्हाधिकारी जलज शर्मा यांनी या संयोजित प्रयत्नांद्वारे कुंभमेळ्याच्या तयारीला गती देण्याचे आश्वासन दिले. सर्व विभागांनी मिळून कुंभमेळ्याच्या यशस्वी आयोजनासाठी एकत्रित काम करण्याच्या संकल्पाने ही बैठक संपन्न झाली.

या बैठकीसाठी विभागीय आयुक्त तथा कुंभमेळा विकास प्राधिकरणाचे अध्यक्ष डॉ. प्रवीण गेडाम, पोलिस आयुक्त संदीप कर्णिक, जिल्हाधिकारी जलज शर्मा, जिल्हा परिषदेचे मुख्य कार्यकारी अधिकारी ओमकार पवार, सार्वजनिक बांधकाम विभागाच्या अधीक्षक अभियंता अरुंधती शर्मा, पोलिस अधीक्षक बाळासाहेब पाटील यांसह विविध विभागांचे वरिष्ठ अधिकारी उपस्थित होते. महानगरपालिकेच्या आयुक्त मनीषा खत्री आणि कुंभमेळा आयुक्त तथा प्राधिकरणाच्या सदस्य सचिव करिश्मा नायर या दूरदृश्य संवाद प्रणालीतून सहभागी झाल्या होत्या.