Santosh Banger: प्राचार्यांना धोपटणं संतोष बांगरांना महागात पडलं, पोलिसांकडून मारहाणीचा गुन्हा दाखल
हिंगोली येथील पॉलिटेक्निक महाविद्यालयातील प्राचार्यास मारहाण करून शासकिय कामात अडथळा आणल्याप्रकरणी आमदार संतोष बांगर यांच्यावर गुन्हा दाखल करण्यात आला आहे.बांगर यांच्यासह ४० जणांविरोधात हिंगोली ग्रामीण पोलिसांनी शनिवारी पहाटे गुन्हा दाखल केला.यात पाच प्राध्यापकांचाही समावेश आहे. हिंगोलीतील पॉलिटेक्नीक महाविद्यालयातील वातावरण मागील काही दिवसांपासून चांगलेच तापले होते. महाविद्यालयातील प्राध्यापकांसह महिला कर्मचाऱ्यांनी प्राचार्य डॉ. अशोक उपाध्याय यांच्याकडून मानसिक छळ होत असल्याचा आरोप केला होता.त्यानंतर आमदार संतोष बांगर हे १८ जानेवारी रोजी महाविद्यालयात गेले असता महिला प्राध्यापक व कर्मचाऱ्यांनी तक्रारींचा पाढाच मांडला होता.त्यानंतर आमदार संतोष बांगर यांनी प्राचार्यास मारहाण केली.मारहाणीचा व्हिडीओ सोशल मिडीयावर व्हायरल झाल्यानंतर प्रकरणाला राजकीय वळण लागले होते.
दरम्यान,या प्रकरणात आज पहाटे प्राचार्य डॉ. अशोक उपाध्याय यांनी हिंगोली ग्रामीण पोलिस ठाण्यात तक्रार दाखल केली. तक्रारीत डॉ.अशोक उपाध्याय यांनी म्हटले आहे की, आमदार संतोष बांगर,शंकर बांगर यांच्यासह प्राध्यापक अशा ४० जणांनी प्राचार्यांच्या कक्षेत येऊन त्यांना शिवीगाळ करून मारहाण केली.तसेच सीसीटीव्हीचे,डीव्हीआरचे वायर तोडून पाच हजार रुपयांचे नुकसान केले. प्राचार्यांनी तक्रार केल्यानंतर पोलिसांनी आमदार संतोष बांगर, शंकर बांगर,महाविद्यालयातील अधिव्याख्याता यांच्यासह ४० जणांवर शासकीय कामात अडथळा आणल्या प्रकरणी गुन्हा दाखल केला आहे.पोलिस निरीक्षक आर.एन.मळघने, उपनिरीक्षक मगन पवार पुढील तपास करीत आहेत.
आमदार संतोष बांगर यांनी १८ जानेवारी रोजी दुपारी साडेअकरा ते बारा वाजण्याच्या सुमारास महाविद्यालयात जाऊन प्राचार्यांना मारहाण झाली होती. मात्र,या घटनेनंतर तब्बल १० दिवसांनी प्राचार्यांनी तक्रार दिली. त्यामुळे १० दिवसांनंतर दाखल झालेला गुन्हा चर्चेचा विषय बनला आहे.
हिंगोलीच्या पॉलिटेक्निक महाविद्यालयातील प्राचार्यांकडून होणाऱ्या मानसिक छळाला कंटाळून काही महिला प्राध्यापक व कर्मचाऱ्यांनी थेट राज्य महिला आयोगाकडे तक्रार केली होती. प्राचार्य डॉक्टर अशोक उपाध्याय यांच्याकडून मानसिक शेअर केला जात असल्याच्या तक्रारी करण्यात आल्या.मात्र, दोन महिन्यानंतरही या तक्रारीची दखलच घेण्यात आली नाही. या प्रकरणात उच्च व तंत्र शिक्षण विभागाकडे केलेल्या तक्रारीनंतर तीन सदस्य पथक मागील आठवड्यात चौकशीसाठी आले होते.या पथकाने सविस्तर जबाब नोंदवले असून पुढील दोन दिवसात यासंदर्भातील अहवाल वरिष्ठ कार्यालयाकडे सादर केला जाणार असल्याचे सूत्रांनी सांगितले.याचसंदर्भात संतोष बांगर विचारणा करण्यासाठी गेले असता प्राचार्यांना समाधानकारक उत्तर देताना आल्यामुळे संतप्त झालेल्या आमदार संतोष बांगर यांनी त्यांचा कान पकडून त्यांना शिवीगाळ करत चोप दिला होता. मात्र, या प्रकाराविषयी अनेकांनी नाराजी व्यक्त केली होती. मंत्रिमंडळात कायदे बनवले जातात कायदे बनवणारे आमदारच कायदे मोडत असल्यामुळे जनतेने कुणाचा आदर्श घ्यायचा, असा प्रश्न अनेकांनी उपस्थित केला होता.
या सगळ्या वादानंतर आमदार संतोष बांगर यांनी स्वत:ची बाजूही मांडली होती. अशोक उपाध्याय यांचे हिला प्राध्यापिकांसोबतचे वर्तन घाणेरडे होते. प्राचार्य सतत महिला कर्मचाऱ्यांना त्रास द्यायचे. काहीही काम नसताना त्यांना ऑफिसमध्ये आणून बसवून ठेवायचे. त्यांच्याशी अश्लील संवाद साधायचे. याचा जाब विचारायला मी गेलो तेव्हाही त्यांनी उडवाउडवीची उत्तरं दिली. त्यामुळे मी प्राचार्यांना मारहाण केल्याचे संतोष बांगर यांनी म्हटले. प्राचार्य आणि महिला प्राध्यापिका यांच्यातील संभाषणाची वादग्रस्त क्लीप माझ्याकडे आहे. ही क्लीप मी उपमुख्यमंत्री देवेंद्र फडणवीस यांना ऐकवली. तेव्हा त्यांनीदेखील माझ्या पाठीवर शाबासकीची थाप दिली,असे संतोष बांगर यांनी म्हटले होते.