Tax वाचवण्याचा फायदेशीर फंडा, ‘या’ टिप्स फॉलो करून जास्तीत जास्त बचत शक्य होईल

आयकर (इन्कम टॅक्स) कायदा १९६१ मध्ये असे अनेक नियम आहेत, ज्याचा वापर करून तुमच्या पालकांना अनेक प्रकारची कर सूट मिळू शकते. जर तुम्ही गुंतवणूक करण्याचा विचार करत असाल, तर अशा ठिकाणी गुंतवणूक करा जिथे एकूण परताव्यावर कर सवलत असेल. आम्ही तुम्हाला अशाच काही टिप्स सांगणार आहोत ज्या मुळे करात जास्त सूट मिळू शकते.

कर टाळण्यासाठी तुम्ही तुमच्या पालकांना काही पैसे भेट देऊ शकता. तुम्ही तुमच्या पालकांना भेटवस्तू दिल्यास, त्यावर गिफ्ट टॅक्स आकारला जात नाही. एवढेच नाही तर तुमच्या पालकांना त्या पैशांवर कोणताही परतावा मिळाला तर तुम्हाला त्यावरही कर भरावा लागणार नाही. जर तुमचे पालक ज्येष्ठ नागरिक असतील आणि ते नॉन-टॅक्सेबल ब्रॅकेटमध्ये येत असतील तर तुम्ही अधिक कर वाचवू शकता. आयकर कायद्याच्या कलम ८०टीटीबी अंतर्गत ज्येष्ठ नागरिकांच्या बँक/पोस्ट ऑफिस ठेवींवरील ५० हजार रुपयांपर्यंतच्या व्याज उत्पन्नाला वजावट म्हणून परवानगी आहे. तसेच, ज्येष्ठ नागरिकांना मुदत ठेवींवर जास्त व्याज मिळते.

तुम्ही तुमच्या पालकांच्या घरात राहत असल्यास, तुम्ही त्यांना भाडे देऊ शकता आणि १०(३ए) च्या सूट मर्यादेत घरभाडे भत्ता (एचआरए) मिळवू शकता. जेव्हा तुमचे पालक तुमच्यापेक्षा कमी टॅक्स स्लॅबमध्ये येतात तेव्हा ही पद्धत अधिक प्रभावी असते. जर तुमचे पालक ज्येष्ठ नागरिक असतील किंवा त्यांचे कोणतेही करपात्र उत्पन्न नसेल, तर तुम्ही कुटुंब म्हणून योग्य प्रमाणात कर वाचवू शकता. यासाठी मालमत्तेची मालकी तुमच्या पालकांकडे असली पाहिजे. तुमची एचआरए कपात योग्यरित्या दावा करण्यासाठी तुम्हाला त्यांच्या बँक खात्यात भाडे हस्तांतरित करावे लागेल किंवा चेकद्वारे पैसे द्यावे लागतील.

तुम्ही तुमच्या पालकांसाठी आरोग्य विमा खरेदी केल्यास, त्यातून तुम्हाला कर सूट मिळू शकते. करदात्याच्या पालकांच्या आरोग्य देखभाल आणि इतर झालेल्या खर्चाच्या कारणावर तुम्ही कर सवलतीचा दावा करू शकता. ही सवलत काही अटी आणि मर्यादांनुसार उपलब्ध आहे आणि आयकर कायद्याच्या कलम ८०डी, ८०डीडी आणि ८०डीडीबी अंतर्गत उपलब्ध असून आयकर कायद्याच्या कलम ८०डी अंतर्गत करदाता त्याच्या पालकांसाठी भरलेल्या वैद्यकीय विम्याच्या प्रीमियममध्ये कपातीचा दावा करू शकतो. कमाल वजावट रुपये २५,००० आणि पालक ज्येष्ठ नागरिक असल्यास ही मर्यादा ५० हजार रुपयांपर्यंत वाढते. याव्यतिरिक्त, जर ज्येष्ठ नागरिक पालकांकडे आरोग्य विमा संरक्षण नसेल, तर करदाता त्यांच्यावर झालेल्या वैद्यकीय खर्चासाठी ५०,००० रुपयांपर्यंतच्या कपातीचा दावा देखील करू शकतो.

कर वाचवण्यासाठी तुमच्या पालकांची मदत घेताना तुम्ही प्रत्येक व्यवहाराच्या नोंदी व्यवस्थित व्यवस्थापित कराव्यात आणि तुमच्या पालकांना दरवर्षी वेळेवर आयकर रिटर्न भरण्यास मदत करावी. तसेच, आयकर रिटर्न भरताना भेटवस्तूंच्या व्यवहारांची नोंदणी करण्यास विसरू नका.