राम सातपुतेंच्या पुढाकारातून संपणार माळशिरसच्या २२ गावांचा ‘जलवनवास’

माळशिरस, १८ एप्रिल : माळशिरस तालुक्यातील बावीस गावांच्या कपाळावर कोरलेला दुष्काळाचा कलंक शेवटी पुसला जाणार आहे. राज्याचे जलसंपदा मंत्री राधाकृष्ण विखे पाटील यांनी बुधवार, १६ एप्रिल रोजी झालेल्या उच्चस्तरीय बैठकीत माळशिरस तालुक्यातील २२ गावांना नीरा-देवधर प्रकल्पातून पाणीपुरवठा करण्याची अधिकृत घोषणा केली आहे. या ऐतिहासिक निर्णयामुळे कोथळे, कारुंडे, पिंपरी, फडतरी, लोंढे मोहितेवाडी, लोणंद, गिरवी, भांब, रेडे, कन्हेर, मानकी, इस्लामपूर, गोरडवाडी, गारवड, नगरवाडी, पठाणवस्ती, तरंगफळ, सुळेवाडी, शिंगोणी, बचेरी आणि जळभावी या गावांच्या पिढ्यानपिढ्या चालत आलेल्या पाण्याच्या संकटाला स्थायी समाधान मिळणार आहे.

माळशिरस तालुक्याच्या नीरा उजव्या कालव्यापासून वंचित राहिलेली ही गावे दरवर्षी उन्हाळ्याच्या हंगामात भीषण पाणीटंचाईचा सामना करतात. या भागातील शेतकरी आणि सामान्य नागरिकांना पिण्याच्या पाण्यासाठीही अनेक किलोमीटरचे अंतर पार करावे लागते. पाण्याच्या अभावामुळे येथील शेतकरी पीक उत्पादनापासून वंचित राहिले आहेत तर युवा रोजगारासाठी मुंबई-पुण्यासारख्या महानगरांकडे पलायन करत आहेत.

या संदर्भात माजी आमदार राम सातपुते यांनी आमदार झाल्याच्या पहिल्या अधिवेशनापासून या प्रश्नासाठी सातत्याने प्रयत्न केले होते. गेल्या काही महिन्यांपासून ते जलसंपदा मंत्रालयाशी नियमित संपर्कात होते. याविषयीची निर्णायक बैठक बुधवारी मंत्रालय मुंबई येथे झाली ज्यामध्ये जिल्ह्याचे पालकमंत्री जयकुमार गोरे, माजी खासदार रणजितसिंह निंबाळकर यांनी सक्रिय सहभाग घेतला. बैठकीदरम्यान जलसंपदा विभागाचे प्रधान सचिव, कार्यकारी संचालक आणि तांत्रिक सल्लागारांनी प्रकल्पाच्या अंमलबजावणीसाठी मार्गदर्शन केले. मंत्री राधाकृष्ण विखे पाटील यांनी स्पष्ट केले की, “या प्रकल्पासाठी तांत्रिक अडचणी दूर करण्यात आल्या आहेत. आता कोणत्याही अडथळ्याशिवाय हा पाणीपुरवठा योजना लवकरच अंमलात येईल.”

राजकीय इच्छाशक्ती आणि प्रशासकीय धाडस एकत्र आले तर कोणत्याही प्रलंबित समस्येला समाधान मिळू शकते. याच उत्तम उदाहरण म्हणजे माजी आमदार राम सातपुते, त्यांनी स्वातंत्र्यापासून प्रलंबित असलेला हा माळशिरस मधील २२ गावांचा महत्वाचा पाणी प्रश्न सोडवण्यासाठी प्रशासकीय स्तरावर आमदार झाल्यापासून प्रचंड असे प्रयत्न केलं , जे काम मागील एकही आमदार लोकप्रतिनिधींना जमले नाही ते राम सातपुते यांनी करून दाखविले आहे

नीरा उजव्या कालव्यापासून वंचित असणाऱ्या माळशिरस तालुक्यातील २२ गावाकडे दुष्काळी गावे म्हणून सातत्याने पाहिले जात होते या ठिकाणी कमालीचे दारिद्र्य वास्तव करीत होते राज्याचे मुख्यमंत्री देवेंद्र फडणवीस, जलसंपदा मंत्री राधाकृष्ण विखे पाटील, पालकमंत्री ना. जयकुमार गोरे, मा.खा. रणजीतसिंह नाईक निंबाळकर व मा. आ. राम सातपुते यांच्या प्रयत्नातून २२ गावांच्या कपाळी असणारा दुष्काळी कलंक पुसणार असल्याचे इस्लामपूर येथील शेतकरी महादेव पवार यांनी सांगितले

जलसंपदा विभागाकडून मिळालेल्या माहितीनुसार, या प्रकल्पाच्या अंमलबजावणीसाठी आता अंतिम तांत्रिक आढावा घेण्यात येणार आहे. यासाठी विशेष तज्ञांची समिती नेमण्यात आली आहे. पाइपलाइनचे काम आणि वॉटर ट्रीटमेंट प्लांटची बांधणी ही प्राथमिक टप्प्यातील कामे असून या वर्षाच्या अखेरीस पाणीपुरवठा सुरू होण्याची शक्यता आहे.

माळशिरस तालुक्याच्या २२ गावांना नीरा- देवधरचे पाणी मिळण्याची ही घोषणा केवळ पाणीपुरवठ्याचा प्रश्न सुटणार नाही तर यामुळे संपूर्ण प्रदेशाच्या आर्थिक-सामाजिक परिस्थितीत मूलभूत बदल घडवून आणणार आहे. माजी आमदार राम सातपुते, माजी खासदार रणजितसिंह निंबाळकर आणि जलसंपदा मंत्रालयाच्या सहकार्याने हा ऐतिहासिक निर्णय शक्य झाला आहे. आता प्रशासनाने वेळपाळावर या योजनेची अंमलबजावणी केल्यास दुष्काळग्रस्त गावांचे भवितव्य खरोखरच उज्ज्वल होईल.