णमोकार तीर्थ म्हंणजे जैन धर्माच्या अहिंसेच्या विचाराने जगाला शांतीचा मार्ग दाखविणारे ‘आध्यात्मिक विद्यापीठ’ – मंत्री भुजबळ

नाशिक, दि. १३ फेब्रुवारी: नाशिक जिल्ह्यातील चांदवड तालुक्यातील मालसाने येथे भव्य अशा णमोकार तीर्थ आंतरराष्ट्रीय पंचकल्याणक प्रतिष्ठा एवं महास्तकाभिषेक महोत्सवाचा आज समारोप झाला. या अध्यात्मिक आणि सांस्कृतिक महाकुंभाच्या निमित्ताने राज्याचे अन्न, नागरी पुरवठा व ग्राहक संरक्षण मंत्री छगन भुजबळ यांनी उपस्थिती लावून या तीर्थक्षेत्राच्या महत्त्वावर प्रकाश टाकला. त्यांनी णमोकार तीर्थ हे केवळ एक धार्मिक स्थान न राहता, मानवतेला दिशा देणारे ‘आध्यात्मिक विद्यापीठ’ असल्याचे गौरवोद्गार काढले.

मोक्षकल्याण, विश्वशांती महायज्ञ आणि समारोप सोहळ्याच्या या पवित्र प्रसंगी मंत्री भुजबळ यांनी जैन धर्माच्या अहिंसा, सत्य, करुणा आणि संयम या मूलभूत तत्त्वांचा जगाला दिलेल्या योगदानाचा गौरव केला. त्यांनी स्पष्ट केले की, सध्या जगभरात पसरलेल्या तणावपूर्ण आणि अस्थिर वातावरणात अहिंसेचा हा विचार अधिक प्रासंगिक आणि मार्गदर्शक ठरतो. जैन समाजाचे हे योगदान विश्वशांतीसाठी अत्यंत महत्त्वाचे आहे, असे मत त्यांनी व्यक्त केले.
समारंभाच्या सुरुवातीला मंत्री भुजबळ यांनी उपस्थित जैन संतवृंदांचे आदरपूर्वक पूजन केले. आदरणीय गणधिपती गणधनाचार्य श्री १०८ कुंथुसागर महाराज साहब, परमपूज्य ज्ञानयोगी प्रज्ञाश्रमण देवनंदी महाराज साहब, परमपूज्य पुष्पदंत सागर महाराज, परमपूज्य अमोघकीर्तीजी महाराज, परमपूज्य अमरकीर्तीजी महाराज यांच्यासह अन्य संतांच्या आशीर्वादाने हा सोहळा अधिक पवित्र झाला. यावेळी सुवंद्य सागर यांच्या ‘मुलाचार प्रदीप’ या ग्रंथाचे लोकार्पण मंत्री भुजबळ यांच्या हस्ते करण्यात आले, ज्यामुळे या प्रसंगी एक साहित्यिक श्रीमंतही झाले.

आपल्या मनोगतात मंत्री भुजबळ यांनी समाजाच्या विकासाची व्याख्या विस्तृत करत सांगितले की, केवळ भौतिक प्रगती म्हणजे विकास नव्हे. रस्ते, उद्योग, इमारती आणि पायाभूत सुविधा या गोष्टी समाजाला प्रगती देतात, पण संस्कार, अध्यात्म आणि मूल्ये समाजाला दिशा देतात. णमोकार तीर्थ हे या दोन्ही बाजूंचा सुंदर संगम असल्याचे त्यांनी नमूद केले. सुमारे ४७ एकर परिसरात उभारलेले हे तीर्थ श्रद्धा आणि आधुनिकतेचा अनोखा संगम घडवत असल्याचे ते म्हणाले.

पर्यावरणीय आणि सामाजिक विकासालाही या तीर्थाने चालना द्यावी, अशी अपेक्षा त्यांनी व्यक्त केली. नाशिक जिल्हा हा नेहमीच धार्मिक, सांस्कृतिक आणि सामाजिक चळवळींचे केंद्र राहिला आहे. कुंभमेळा आणि अनेक तीर्थक्षेत्रांनी समृद्ध असलेल्या या भूमीला णमोकार तीर्थामुळे नवी ऊर्जा मिळाली आहे. यामुळे पर्यटन, रोजगार आणि स्थानिक विकासालाही चालना मिळेल, असे ते म्हणाले.

संतांच्या मार्गदर्शनाबद्दल बोलताना मंत्री भुजबळ म्हणाले की, कुंथुसागर महाराज, देवनंदी महाराज आणि इतर प्रमुख जैन संतांचे विचार समाजाला आध्यात्मिक ऊर्जा देणारे आहेत. त्यांच्या शिकवणीतून समाजात शांतता, सद्भावना आणि बंधुभाव वाढण्यास मदत होईल. समाजात समता, सामाजिक न्याय आणि मानवतेची भावना रुजविण्याचे कार्य धर्म आणि अध्यात्माच्या माध्यमातून अधिक प्रभावीपणे करता येते, असा विश्वास त्यांनी व्यक्त केला.
शेवटी, मंत्री भुजबळ यांनी भावना व्यक्त केल्या की, णमोकार तीर्थ हे केवळ एक मंदिर न राहता, विश्वशांतीचा संदेश देणारे केंद्र, नाशिकच्या विकासाचा आधार आणि मानवतेला दिशा देणारे आध्यात्मिक शक्तीस्थान बनेल. पुढील हजारो वर्ष हे तीर्थ विश्वशांती, मानवकल्याण आणि आध्यात्मिक जागृतीचा संदेश देत राहील, अशी आशा त्यांनी व्यक्त केली. संतांनी केलेल्या मागण्यांप्रमाणे जैन संतांच्या निवासस्थानाच्या निर्मितीसाठी प्रयत्न करण्यात येतील, असे आश्वासनही त्यांनी यावेळी दिले.

या महोत्सवाला महोत्सव समितीचे राष्ट्रीय अध्यक्ष संतोष पेंढारी, भूषण कासलीवाल, सुमेरकुमार काले, अल्केश कासलीवाल यांच्यासह असंख्य जैन समाजबांधव आणि भाविक उपस्थित होते. या आयोजनाने नाशिक जिल्ह्याच्या सांस्कृतिक इतिहासात एक सुवर्णपान समाविष्ट केले आहे.