आर्यन खानला ड्रग्जसहित ताब्यात घेतलं; एनसीबीनं दिली माहिती!

सजग मराठी वेब टीम

मुंबई | मुंबईच्या केंद्रीय अमली पदार्थविरोधी पथकाने (एनसीबी) कोर्डेलिया क्रूझवर २ ऑक्टोबर रोजी छापेमारी केली आणि ८ जणांना ताब्यात घेतलं. यामध्ये आर्यन खान व्यतिरिक्त यात मुनमुन धामेचा, अरबाज मर्चंट, नुपूर सारिका, इस्मीत सिंग, मोहक जसवाल, विक्रांत छोकर आणि गोमित चोप्रा यांनाही विविध प्रकारच्या ड्रग्ससह ताब्यात घेतल्याची माहिती एनसीबीने आज पत्रकार परिषदेत दिली.

२ ऑक्टोबरला कार्डेलिया क्रूझवर केलेल्या या कारवाईत आर्यन खानसह आठ जणांजवळून पाच ग्रॅम मेफ्रेडॉन (एमडी), १३ ग्रॅम कोकेन, २१ ग्रॅम चरस, एमडीएमएच्या २२ गोळ्या व एक लाख ३३ हजारांची रोकड जप्त करण्यात आली आहे, असंही एनसीबीच्या अधिकाऱ्यांनी पत्रकार परिषदेत सांगितलं. तसेच मोहक जसवालच्या माहितीनंतर जोगेश्वरीतून अब्दुल शेखला ताब्यात घेतलं, असंही एनसीबीच्या अधिकाऱ्यांनी सांगितलं. त्यानंतर तपासात मिळालेल्या माहितीच्या आधारे ४ ऑक्टोबरला गोरेगावमध्ये एनसीबीने कारवाई केली, याठिकाणी एका व्यक्तीला अमली पदार्थासह अटक केली.

मनीष राजगरीया जो या क्रूझवर पाहुणा म्हणून आला होता, त्याच्याकडूनही ड्रग्स जप्त करण्यात आले आहेत. याशिवाय अरविंद साहू नावाच्या एका व्यक्तीला देखील अटक करण्यात आली आहे. त्यानंतर ५ ऑक्टोबरला आणखी चार जणांना या प्रकरणात अटक करण्यात आली. त्यामध्ये गोपालजी आनंद, समीर सेहगल, मानव सिंघल यांचा समावेश आहे. हे सर्वजण एका इव्हेंट मॅनेजमेंट कंपनीशी संबंधित असल्याची माहिती एनसीबी अधिकाऱ्यांनी दिली.

प्रभाकर सैल, किरण गोसावी, मनीष भानुशाली, ऑर्बे गोमेज, आदिल उस्मानी, वी वेगांकर, अर्पणा राणे, प्रकाश बहादूर, शोएब फैज आणि इब्राहिम हे या प्रकरणातील प्रत्यक्षदर्शी होते, असंही अधिकाऱ्याने सांगितलं. तसेच एनसीबीवर करण्यात येत असलेले आरोप हे तथ्यहीन असून या संपूर्ण प्रकरणाची चौकशी आम्ही निपक्षपातीपणे आणि कायद्याच्या चौकटीत राहून करत आहोत, असं या अधिकाऱ्याने म्हटलंय.